Na tarde do sábado, 13 de decembro, nun Teatro Principal totalmente abarrotado, Música e Cultura de Galicia levou a cabo unha magnífica mostra musical do traballo que realizou durante o ano 2008 nas instalacións do IES da Farixa de Ourense.

A asociación cultural decidiu dedicarlle ós pais e titores do seu alumnado o concerto que interpretaron varios grupos da súa organización.  Diversas autoridades públicas dos ámbitos político, educativo e relixioso, acompañaron ós participantes no evento. Entre todas elas, salientámo-la presenza de don Miguel Reza, director do IES da Farixa; don Miguel Quinteiro, bispo da Diócese de Ourense; e de don José Luís Baltar, presidente da Deputación Provincial. 

Por orde sucesiva pasaron polo escenario o grupo de música e movemento da escola de música, as cantareiras, o grupo de guitarras Cordas Bravas, a sección de gaitas, a banda infantil da asociación e a banda de música do concello de Barbadás, que a nivel musical constitúe o buque insignia de Música e Cultura de Galicia.

O numeroso público asistente premiou con prolongados aplausos a brillante actuación dos integrantes da asociación e saíu con evidentes ganas de non perderse o próximo festival que leve a cabo a nosa agrupación. Quédanos, por tanto, a agradable sensación que deixa o traballo ben feito.